కొంటె కవితకి ముద్దుగుమ్మ స్పందన

నాపై కవితలల్లి కలవరించకు
నాలో కలతరేపి పరవశించకు
ఊరు, పేరు అడిగి మరీ వేధించకు
ఊసులేవో చెప్పి మరీ విసిగించకు

అడిగావని చెప్పనా నా పేరును
అభినందించనా నీ ప్రతిభను
నా పలుకులే నీకు మధురమా
నా నామమే నీకు సుమధురమా

డైలీ పేపర్లలో అడిషనల్ పేరు కాదు
వీక్లీ పుస్తకాల గోలలో నా పేరెందుకు
పక్షపు పత్రికల వలపక్షపు తీరు కాదు
మాస పత్రికలలోలా మూసపు పేరు కాదు

కవులందరి కలం నుండి వెలువడేదే నా పేరు
కవి హృదయపు మదిలోన కొలువుండును నా పేరు
అక్షరాలు పొందుపరుచు నేర్పరులకు తెలుసు నా పేరు
కవులందరూ కోరుకునే కీర్తికి స్ఫూర్తి నా పేరు

నా పేరు తెలియని కవి కానరాడు కొరగాడు
ఇప్పటికయినా తెలిసిందా నా పేరు
ఊరించను ఇంకా నీ మనసుని శోధించను
తెలుపనా నా పేరును ఐతే తెలుసుకో
నా పేరు రచన